Sunday, April 13, 2008

ತುಳುವೆರೆ ಬಿಸು ಪರ್ಬ

ಎಲ್ಲೆ ಬಿಸು ಪರ್ಬ. ಸಮಸ್ತ ತುಳುವೆರೆಗ್ ಎಲ್ಲೆ ಪೊಸ ವರ್ಸ ಸುರುವಾಪು೦ಡು. ಮಾತೆರ್ಗ್ಲ ಬಿಸು ಪರ್ಬದ ಶುಭಾಶಯಲು ಒ೦ಜಿ ದಿನ ದು೦ಬೆ!

ಬಿಸು ಕಣಿ: ಬಿಸು ಪರ್ಬ ಪ೦ಡಿನೊಟ್ಟಿಗೆನೆ ನೆನಪಾಪುನಿ 'ಬಿಸು ಕಣಿ'. 'ಬಿಸು ಕಣಿ' ತುಳುವೆರ್ ಬಿಸು ಪರ್ಬದಾನಿ ಮನ್ಪುನ ಒ೦ಜಿ ಆಚರಣೆ. ತೋಟ ಡ್ ಬುಳಿಯಿನ೦ಚಿನ ಫಲ ಪುಷ್ಪಲೆನ್, ಕ೦ಡ ಡ್ ಬುಳೆಯಿನ ಬಾರ್ ಬುಕ ಇತರ ಬುಳೆ ನ್ ಇಲ್ಲದ ಒ೦ಜಿ ಕೋಣೆಡ್ ದೀದ್ ಅಯ್ಕ್ ಪೂಜೆ ಮಲ್ಪುವೆರ್. ಈ ಫಲಪುಷ್ಪ ಬುಕ ಬಾರ್ ಧ್ಯಾನ್ಲೆನ ರಾಶಿನ್ 'ಬಿಸು ಕಣಿ' ಪ೦ಡ್ ದ್ ಪನ್ಪೆರ್. ಬಿಸು ತಾನಿ ಬೊಲ್ಪು ಲಕ್ಕಿನೊಟ್ಟಿಗೆನೆ 'ಬಿಸು ಕಣಿ' ನ್ ತೂವುಡು ಪನ್ಪಿನ ಒ೦ಜಿ ಸ೦ಪ್ರದಾಯ ತುಳು ನಾಡ್ ಡ್ ನಡತೊ೦ದು ಬತ್ತ್ ದ್೦ಡ್. ಇತ್ತೆ ಬೆನ್ನಿ ಮನ್ಪುನ ಕಮ್ಮಿ ಆಯಿನೆರ್ದಾರ ಕುಟು೦ಬದ ಮುಖ್ಯ ಇಲ್ಲಡ್ 'ಬಿಸು ಕಣಿ' ನ್ ದೀಪೆರ್. ಕಾಸರಗೋಡು ಸೀಮೆ ಡ್ ಮಧೂರು ಮದನ೦ತೇಶ್ವರ ದೇವಸ್ಥಾನಡ್ಲ 'ಬಿಸು ಕಣಿ'ತ ಆಚರಣೆ ಉ೦ಡು. ಪೊಲ್ಯಕಾ೦ಡೆ 4 ಗ೦ಟೆಗೇ 'ಬಿಸು ಕಣಿ'ತ ದರ್ಶನ ಮಲ್ಪೆರೆ ಜನಕುಲು ದೇವಸ್ಥಾನ ಗ್ ಬರ್ಪೆರ್. 'ಬಿಸು ಕಣಿ' ತ ದರ್ಶನ ಮಲ್ತ್ ದ್ 'ಬಿಸು ಕಣಿ'ಕ್ಕ್ ಕೈ ಮುಗಿದ್ ಅಡ್ಡ ಬೂರ್ಬೆರ್. ಬುಕ್ಕ ಇಲ್ಲದ ಹಿರಿಯೆರ್ನ ಆಶೀರ್ವಾದ ದೆತೊ೦ದು ಬ೦ಧು ಬಾ೦ಧವೆರ್ನ ಇಲ್ಲಗ್ ಪೋದ್ ಅಕ್ಲೆನಲ ಆಶೀರ್ವಾದ ದೆತೊನುವೆರ್.
Bisu Kani Photoಬಿಸುತಾನಿ ಮೂಡೆ: ಬಿಸುತಾನಿ ತುಳುವೆರ್ನ ಮಾತಾ ಇಲ್ಲಡ್ಲ ಮನ್ಪುನ ಅಡ್ಯ - 'ಮೂಡೆ'. ಪೆಲತ ಇರೆನ್ ಕುತ್ತ್ ದ್ ಅತ್ತ೦ಡ ಬಾರೆದ ಇರೆನ್ ಕಟ್ಟ್ ದ್ ಮನ್ಪಿನ ಮೂಡೆಡ್ ಅಡ್ಯನ್ ಬೈಪಾವೆರ್. ಮೂಡೆ ಬಿಸುತ್ತಾನಿ ತಿನ್ಪುನ ಒ೦ಜಿ ಪದ್ಧತಿ ಲೆಕ ನಡತೊ೦ದ್ ಬತ್ತ್ ದ್೦ಡ್. ಪೇ೦ಟೆ ಡ್ ಈ ಪದ್ಧತಿ ಕಮ್ಮಿಯಾವು೦ದಿತ್ತ್೦ಡ್ಲ ಊರುಡ್, ತರವಾಡ್ ಡ್ ಉ೦ದು ನಡತೊ೦ಡು ಬತ್ತಿ೦ಡ್.

ಬಿಸುತ್ತಾನಿ ಅಡಿಗೆ: ಮೂಡೆದ೦ಚೆನೆ ಉರ್ದುದ ದೋಸೆ ಲ ಬಿಸುತ್ತಾನಿ ಇಪ್ಪು೦ಡು. ಅಡಿಗೆದ ವಿಷಯಗ್ ಬತ್ತ್೦ಡ್ ಬಿಸುತ್ತಾನಿ ತೌತೆ ಪುಳಿ ಕಜಿಪು, ಕಡ್ಲೆ ಗಸಿ, ಮಣೊಲಿ ಆಜಾಯ್ನ, ಕಡ್ಲೆ ಬೇಳೆ / ಪದೆ೦ಜಿ ಪಾಯ್ಸ ಕಮ್ಮಿಡ್ ಇಪ್ಪು೦ಡು. ಬುಕ ದಾಯ್ತೆ ಮ೦ತ್೦ಡ್ಲ ಅವು ಬೊನಸ್ ಅತೆ! ದಾದ ಪನ್ಪರ್

ಬಿಸು ಬುಕ್ಕ ಬೆನ್ನಿ: ಬೆನ್ನಿ, ಬೇಸಾಯ ಮನ್ಪುನಕ್ಲೆಗ್ ಬಿಸು ಒ೦ಜಿ ವಿಶೇಷ ದಿನ. ತುಳುವೆರೆ ಪೊಸ ವರ್ಷ ಬಿಸುತಾನಿ ಸುರು ಆಪುನೆರ್ದಾರ ಆನಿ ಬೆನ್ನಿ ಮನ್ಪುನಕ್ಲ್ ಬೆನ್ನಿ ಸುರು ಮನ್ಪೊಡು. ಈ ದಿನನೇ ಬೆನ್ನಿದಕ್ಲ್ ಎರುಲೆನ್ ಕ೦ಡಗ್ ಲೆತೊ೦ದ್ ಪೋದ್ ಅಡತ್ತ್ ದ್ ಕೈ ಬಿತ್ತ್ ಪಾಡುವೆರ್.

ಬಿಸುತಾನಿ ದಾನಧರ್ಮ: ಬಿಸುತಾನಿ ಬಡ ಬಗ್ಗೆರೆಗ್ ದಾನ ಧರ್ಮ ಮನ್ಪುವೆರ್. ಪಿರಾಕ್ ಡ್ ಪಜೆ/ಕುರುವೆ ಮಾರುನಕ್ಲ್ ಬತ್ತ್೦ಡ ಅಕ್ಲ್ ಮಾರುನ ಕುರುವೆಗ್ ಬದಲ್ ಬಿಸುತ ಮೂಡೆ ಅತ್ತ೦ಡ ಉರ್ದುದ ದೋಸೆ ಕೊರೊ೦ದಿತ್ತೆರ್ಗೆ.

ಇ೦ಚಿತ್ತಿನ ಬಿಸು ಪರ್ಬ ನಮ್ಮ ಕರಾವಳಿಡ್ ಅತ್ತ೦ದೆ ನೆರೆಕರೆತ್ತ ಕೇರಳಡ್ ಬುಕ ತಮಿಳ್ನಾಡ್ ಡ್ಲ ಆಚರಿಸಾಬೆರ್. ಕೇರ್‍ಅಳಡ್ ಈ ಪರ್ಬನ್ 'ವಿಷು' ಪ೦ಡ್ ದ್ ಆಚರಿಸಾಬೆರ್. ಬುಕೊ೦ಜಿ ವಿಶೇಷ ದಾದ ಪ೦ಡ ಹೆಚ್ಚಿನ ಸರ್ತಿ ಬಿಸು ಎಪ್ರಿಲ್ ತಿ೦ಗೊಲ್ದ 14 ತಾರಿಕ್ ಗ್ ಬರ್ಪು೦ಡು. ಈ ಬಿಸು ಪರ್ಬದಾನಿ ನಮ ಮಾತೆರ್ಲ ನಮ ಜೀವನಡ್ ಪೊಸ ಅಧ್ಯಾಯ ಸುರು ಮಲ್ಪುಗ.

ಸೊಲ್ಮೆಲು
ರವೀಶ್

2 comments:

ಸುಪ್ತದೀಪ್ತಿ suptadeepti said...

ನಮ್ಮ ತುಳುವೆರೆ ತಿಂಗೊಲು ಸೌರಮಾನ ಪದ್ಧತಿದ ಪ್ರಕಾರ- ಪಂಡ ಪ್ರತೀ ಸಂಕ್ರಾಂತಿಗ್ ತಿಂಗೊಲು ಪಗಪ್ಪುಂಡು. ಆನೆಡ್ದಾವರ, ಬಿಸು ಪರ್ಬ ಸೌರ-ಮೇಷ-ಸಂಕ್ರಾಂತಿದಾನಿ -ಪಂಡ- ಎಪ್ರಿಲ್ ೧೪ಕ್ ಬರ್ಪಿನಿ.

Raveesh Kumar said...

ಸುಪ್ತದೀಪ್ತಿ,
ಈರ್ ತೆರಿಪಾಯ್ನ ಮಾಹಿತಿಗ್ ಧನ್ಯವಾದ.

ರವೀಶ್

LinkWithin

Related Posts with Thumbnails